Visita de "PEQUEÑITA"

Hai uns días que na nosa biblioteca tivemos unha visita moi especial. PEQUEÑITA, unha cadeliña de terapia, que se acercou ao noso centro para coñecer ao alumnado de 1° de primaria.Foi unha experiencia preciosa na que puidemos aprender máis sobre o respecto, o coidado e a convivencia cos animais. O alumnado estivo moi atento, participou con curiosidade e desfrutou moitísimo deste encontro tan enriquecedor.
Grazas á Aula da Natureza e a Escola Tephira, por esta oportunidade. 

Día de Rosalía de Castro

 Para conmemorar o Día de Rosalía de Castro o  EDLG lanzou esta proposta ao alumnado de cada aula, que tivo a oportunidade de expresar a súa propia interpretación de Rosalía. O resultado é o que vedes neste vídeo. creacións nas que se mesturan reflexión, creatividade e sentimento.

En cada traballo aparece non só a figura de Rosalía, senón tamén todo o que continúa representando na actualidade: a nosa lingua, a identidade, a sensibilidade e a riqueza cultural.

Deste xeito, nas aulas segue presente a súa inspiración: unha Rosalía que continúa viva a través da mirada das novas xeracións.

O circo en Stop motion

 Hoxe foi un día especial para a rapazada de 3º A e 3º B. Dentro do programa de Bibliotecas Creativas e  grazas a Algarabía Animacións. realizamos un obradoiro de stop motion que foi do máis entretido, divertido e interesante. Tomás e Virginia foron os nosos guías nesta aventura tan especial. 

Comezamos modelando as nosas figuras con plastilina: magas, equilibristas, forzudos, pallasos, etc...

A continuación pasamos á zona de animación e sobre uns fondos que ao longo da semana estivemos preparando colocamos as nosas personaxes e foto a foto coas tablets fomos dando movemento as nosas figuras. Os forzudos levantaban as pesas, os pallasos facían malabares, as magas poñían e quitaban o sombreiro e sacaban pombas, as equilibristas camiñaban polo arame e as ximnastas facían equilibrios e números divertidos coas pelotas. Quedaron xenial e pasámolo requetebén. Unha forma diferente de aprender que non esqueceremos. Grazas Tomás e Virginia. Deixámosvos fotos e vídeos da xornada.

Día das enfermidades raras.

O 28 de febreiro celébrase o Díad as Enfermidades Raras e no noso cole queremos apoiar esta causa e as familias que conviven con estasituación. Por ese motivo, o alumnado de 3º A e de 4 anos xuntouse na biblioteca para coñecer mellor esta realidade. Falamos sobre a importancia da empatía e da visibilidade. Despois lemos o conto "Mimi e a xirafa azul" e elaboramos uns marcapáxinas conmemorativos que levaron para casa como recordo desta xornada tan especial.

Entroido 2026

No CEIP de Seixalbo vivimos un Entroido cheo de maxia, cor e moita ilusión arredor do noso PDI, adicado este curso ao circo. Durante días preparamos no cole os disfraces que deron vida a un auténtico espectáculo: pallasos e pallasas de mil expresións, magos sorprendentes, coellos que saían das chisteiras, mimos, arlequíns e ata palomiteiros que parecían recén chegados dunha gran función.

O día grande achegámonos ao centro da localidade  onde, baixo unha carpa, desfilamos e bailamos ao son da charanga. O ambiente foi festivo e participativo, cun público entregado que gozou co noso desfile circense. Despois, continuamos a celebración cun percorrido polas rúas da localidade acompañados pola música, compartindo a alegría do Entroido con toda a veciñanza.

Queremos expresar o noso agradecemento á asociación de veciños pola súa colaboración e implicación. A súa participación foi moi especial, xa que tamén adoptaron a temática do circo para vestir aos seus mecos, Paquito, Nicanor e Vicentiño que luciron espectaculares e contribuíron a encher de cor e humor a festa.

Foi unha xornada inesquecible de convivencia, creatividade e comunidade, da que deixamos testemuño nas imaxes que acompañan esta entrada. Agardamos que as disfrutedes tanto como nós gozamos vivíndoa.

Veciños e alumnos representando a pirámide do Circo dos Muchachos

Mecos do pobo coa temática do noso PDI

Día da muller e a nena na ciencia 2026

 O 11 de febreiro celébrase o Día de Muller e a nena na ciencia e na biblioteca temos desde aquela unha escolma de libros relacionados con esa temática. Na aula de 2º B investigaron e aprenderon en equipos sobre varias mulleres científicas: Antonia Ferrín, Begoña Vila, Sara G. Alonso, Ángeles R. Robles e Ángeles Albariño e fixeron un mural cos seus traballiños.

Na aula de 3º A leron o libro "Ellas también cuentan" de Ana Alonso e realizaron uns traballiños de cada unha das mulleres científicas que aparecen nel.